Mézami, okipe demoune sa sé konm in n’afèr nou — in pé rante nou ! — néna sa dann san. I fo dir sa sé kékshoz i marsh bien avèk ladi-lafé, noute spor nassyonal. Sak lé annuiyan sé ké ni diré toute demoune lé famiye issi La Rényon é kan ou l’apré raporte dsi in moune talèr la pèrssone i koné bien lo moune é étone pa ou si sa i fé déga.

Sak sré lo méyèr atitide sré motus é boush kouzu, mé néna d’moune i yèm pa lèss linpréssion zot i koné pa pèrssone sé pou sa zot i done dann lo ladi-lafé mèm si i pé avoir danzé. Di pa mwin la pa ariv azot rakonte in zistoir dsi in moune dann zorèye son méyèr zami, sansa son méyèr famiye.

Alé ! Mi kite azot rofléshi la dsi é ni artrouv pli d’van, sipétadyé.

Justin