Gouvèrné sé prévoir, é si i prévoi pa, kossa k’i éspass ?

5 mars, sanm Justin

Mézami, mwin la touzour antann dir ladministrassion, lé rar èl i pran in déssizyon a-tan, é o kontrèr, èl lé touzour apré kour déyèr pou trapé. Poitan bann zinstriman pou kalkil lé shoz par avanss, si mi tronpe pa, sa i égziss é sré mèm possib mète azot an akssyon tèl sorte nou l pa pri o dépourvu kom i di dann fab La fontaine.

Issi la Rényon, mi panss i pé di sa pou in bonpé d’zafèr. Lo dèrnyé zafèr mwin la antann parlé sé kouran élékrik. I parétré nou lé riskab soufèr dan bann zané k’i vien in sorte péniri d’kouran é pou kossa, pars i paré lo park otomobil éléktrik lé riskab mète anou san tardé dann la pane kouran — arzoute èk sa bann klimatizassion épi d’ote form gaspiyaz..

Mé néna lontan la anparl loto épi lo bis éléktrik — la anpal ossi la klimatizassion natirèl — mé lo rézoneman d’apé sak i paré la zamé alé ziskoboute. Paul Vergès l’avé anparl lotonomi énèrzétik avèk pa in sèl sours mé plizyèr mé l’éta épi la droite — dizon bann anti Vergès — lé pli intélizan ké bann kominiss é sak bann kominiss l’avé prévi ébin sa téi doi pa arivé.

Dann in bonpé domène nou lé konmsa — an rotar dsi noute épok. Pli pir, nou lé konm l’autruche, ni bour noute tète sou galé épi ni panss bann shassèr i gingn ar pa oir anou. Mé élas Ménétas mon kèr lé an filass é sak ni rofiz la plipar d’tan li lé riskab arivé — antanssion li ariv déza !

A bon antandèr, salu !

Justin

Padport

Signaler un contenu

Inn modékri, inn ti lavi, inn komantèr ?