L’èr-la in bonpé d’moune i rode pou kossa i fé pa é biensir i trouv bon zarguiman pou dir issi i pé mpa fè zafèr konmsa. In légzanpe i vien dann mon tète sé dori. Dopi dé zané é dé zané nou lé in bonpé apré dir dori i pouss La Rényon é lé possib planté - lé possib an avoir in prodikssion pou amène anou dann shomin lotosifizanss.

Ni koné lo mové rol bann zinportatèr la zoué issi é koman zot la vnyabou sabote toute bann tantativ pou produi dori… Sa i vé dir néna bann fors issi i pé anpèsh anou fé dé shoz lé dann noute zintéré d’fèr é lé possib fèr.

Souvan dé foi bann réspobnsab noute parti la anmparl kann é si ni sava rolir Témoignages mwin lé sir é sèrtin nou va trouv plizyèr mily paz dsi kann é pou dir koué ? Pou dir kann la pa solman dosik mé in kantité produi pou akonpagné ziska sèrv konm i bon baz noute dévlopman…

Zordi apré lo sabotaz l’Érop an konplissité avèk lo gouvèrnman sossyalist dann tan l’opinion i kroi sé par sharité k’i ankouraz bann plantèr pou plante kann é lé assé méprizan pou banna.

Ala pou kossa mi di azot é la pa promyèr foi kozman mwin la marke an-o la i déprime amwin énorméman mèm si mi koné souvan dé foi sa lé fo, fo épi archi-fo.

A bon antandèr, salu !

Justin