Mézami, lir bien sak mwin la ékrir an-o la é zot va rann azot konte koman lé difissil fé in n’afèr konmsa. Mi rapèl la kaz l’avé in bèf téi apèl Rouzé é sé pa kossa l’arivé, in zour, Rouzé i vé pi boir ni manzé. Flate ali, i sèrv de riyin. Mète do sèl dann son gamok okin rézilta. Gramoune la pran la kolèr la tape in kou d’poin dsi lomoplate lo bèf é sa pa pa aranz lé shoz. Si tèlman té oblijé fé vnir in boushé pou tyé lo bèf.

Astèr si ni lèss de koté lo bèf épi son manke lanvi boi, koman ni fé travaye in marmaye i vé pa travaye. Koman ki fé aprann in zélèv la pa anvi aprann ? Gran traka pou bann amontrèr ! Gran soussi pou zot !

Alé ! Mi kite azot rofléshir dsi in problèm konmsa é ni rotrouv pli d’van, sipétadyé.

Justin