Mézami issi La rényon konm in pé partou, néna d’moune i pran zot mal an passyans. La pa zot pou souplègn pli k’i an fo. Mé néna d’ote i fo oir koman zot pli pti zafèr zot i siporte pa. Konm ou lé pa dan zot, wi gingn pa savoir si i fé mal pou vréman, sansa si i fé mal in pé é zot réakssion lé pli for k’lo mal.

Bann dmounne konmsa, ni apèl sa mal-soufan : si wi di azot ou néna in pyé i fé mal, zot sé lé dé k’lé an doulèr. Si wi di in min i va pi, zot sé lé dé. Toute fasson zot lé pou dir aou zot soufranss lé pli for ké la vote sansa sète toulmoune.

Par l’fète mi di sa, mé na poin in rozistrèr doulèr, donk pétète lé vré, pététe lé pa vré. Antouléka souvan défoi dovan in n’afèr konmsa ou lé a-kour dovan la bass-kour si tèlman ou lé touzour a domandé si oute réakssion sé in bon réakssion. Mi atann lo zour la médssine va invante in laparèye pou mézir la doulèr. Pétète i égziss, lo moune lé sitèlman monstré.

An atandan, mi domann azot pou rofléshir la dsi é ni rotrouv pli d’van, sipétadyé.

Justin