Médam zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami zot i koné martin ? Sirésèrtin zot i koné pars sa in zoizo kalifyé issi dann noute péi. Si i pran ali a tan i pé aprann ali kozé- fassonn dir !-pars li pé aprann dir plizyèr mo san konète lo sanss pou vréman. Antouléka sé mwin ki panss konmsa.

Pou li aprann bann mo i fo koupe son filé é lo fin di fin sé d’aprann ali ziré.li fé sa avèk plézir é demoune lé bien kontan d’antann ali. Poitan sa la pa in zoizo La Rényon sa-li sorte déor-li sorte dann l’Inde- é demoune la fé vnir ali lané 1760 pou élimine bann shéniye, bann shipèk épi d’ote nuizib mé sa i anpèsh pa li manz oute papaye, oute mang a l’okazion. Li pé mèm rante dann oute kuizine pou rode kékshoz pou ranpli son zabo.

Sa sé pou lo martin (martin triste ?) mé demoune ossi défoi i koz bonpé é dann in ka konmsa i di sak mwin la marke an-o la, mèm si la pa bézoin koupe filé in moune pou aprann ali kozé.

Alé ! mi kite azot rofléshir in pé la dsi é ni rotrouv pli d’van, sipétadyé.