Mézami, mi panss la fine ariv azot in diskission avèk in moune donk zot i pé dir amwin si lé pli proférab diskite avèk in moune intélizan k’avèk in kouyon… mwin lé sirésèrtin lé pli préférab diskite avèk in moune intélizan k ‘avèk in moune boushé.

Lo moune intélizan i shoizi son zarguiman, i rolativiz, i pran in ton modéré pou konvinke son ladvèrssité. Lo moune boushé i koné arienk fonss dann ta é si li néna dé-troi zarguiman li pou fé antann aou sa in bonpé foi pars la répétission i jène pa li.

Momandoné, konm toute shoz néna inn fin, i fo arété épi dir ali li néna rézon, mèm si li néna tor mil foi é ni artrouv pli d’van, sipétadyé.

Justin