Lé myé ké pa anparlé mé si ni pé alé pli loin k’sa, sré pli proférab é koman ni pé alé pli loin ?

Mi panss déza, ni pé rouv noute téléfone — in bonpé d’moune néna sa koméla ! — épi rogarde sak li vé bien dir anou dsi zourné-la. Déza nou va oir sé in zourné internassyonal déssidé par l’ONU — organizassion bann nassion uni — konm zourné internassional bann fam, sansa ankor zourné internassional lo droi bann fam é si i di sa, sé sirman pars dann lo monde bann fam lé ankor dan la lite pou gingn pliss dé droi ké zot néna zordi, pliss de droi k’i mérite azot.

Mé o fète, pou kossa in zourné internassional ? Sirman pars sak la désside sa la voulu mète an plass in solidarité internassional pou bann fam souvan dann in bataye san fin pou réklam l’égalité avec lé z’om par raporte zot droi.

Zot i koné i parl souvan la lite bann fam dann L’amérik, bann travayèz biensir… Pa bann bourzoiz. Iparl ossi la grèv bann fam dann la Russie lané 1917 pars zot mouvman pou lo pain épi pou la pé la lanss in gran mouvman révolissyonèr. Zistoman sa téi tonb lo 8 mars donk bone okazyon pou ké lo 8 mars i dovien in zourné internassyonal. Ni pé ossi an parl bann madam pou gingn sinploman lo droi voté konm sak téi apèl bann sifrazete dann L’anglétèr, épi dan La franss épi dann d’ote péi ankor.

Si nou la suiv in pé laktyalité ni koné k’a partir d’mintnan lo droi pou l’IVG sar marké dann la konstitission. In bon nouvèl ? Sirman. Mé plito la pèr k’in movèz nouvèl i ariv inn-sé zour avèk in viktoir touzour possib l’ékstrème droite é lé pli difissil tir sa dann la loi fondamantal ké dann la loi ordinèr. In bone nouvèl pars mi panss bonpé péi va sèye fé parèye.

Pétète zot lé riskab dir amwin sa sé in viktoir d’lux pou bann madam déza bien doté an droi, pars lé vré dan lo monde antyé néna bann fami maltrété : sak i gingn lo kou mèm la mor avèk zot bononm, sak i fé parti lo monde lo pli pov ké néna… Sèl zafèr mi réklam sé ké bann fam i gingn la plass i mérite azot dann la sossyété.
A bon antandèr, salu !

Justin