I tir pa dsu lanbilanss ? Poitan défoi i fo bien
16 avril, sanm
Mézami zot la vi konm mwin dann télé la bann Didier Robert... Zot prossé i sorte komanssé. li va done sak li va doné mé néna in n’afèr bien rogrétan : ni koné lékip-la la fé bonpé lo tor La Rényon. Zordi ké li lé fine fé son sal boulo, li pass an prossé. Mé la pa arète son bra kan li lété apré détrui lo bon travaye kominiss noute kamarade Paul Vergès.
Mi rapèl promyé diskour li la fé kan li l’anonss son déssizion pou kass travaye Paul Vergès. Mi rapèl koman son bann partizan téi bate la min. Zour-la toute sak la Rényon néna konm konpliss lésploitassion néo-kolonyal lo kèr té klèr. Pou kossa ? Pars zot téi san lèr té fine rovni pou kontinyé ésploité san pèr é san roprosh… avèk zot bone konssyanss vi ké zot lété dann kan lorde néo-kolonyal établi.
Toulézour la bone press va raporte lo prossé san alé dann fon dé shoz, san alé rode la vérité par zot mèm mé konm i di, na poi arien lé nouvo dan sa. Sa i rapèl amwin in kozman mi sorte lir dsi Facebook té i di konmsa an parlan bann zoinalist lo ta : « Inn i di la plui i tonb, l’ote i di la plui i tonb pa. Kossa k’i ansèrv ékri sa dannn zoinal ? Akoz i sar pa rouv la fénète pou vérifyé si la plui i tonb sansa si li tonb pa »
Alon arète la pou linstan pars i di bien, i fo pa tir dsi lanbilanss. Poitan défoi i fo bien.
A bon antandèr salu.
Justin
Signaler un contenu
Inn modékri, inn ti lavi, inn komantèr ?
