Moin la assist in pé lo féklèr lofis la roganiz avèk in fakilté laba Bordeaux é bann amontrèr téi vien galman pou rakonte zot lékspèryanss dann in klass pti marmaye. Wala kossa in madam, amontrèz, la rakonte anou dsi in tèst pou konète si bann pti marmaye i rotrouv azot bien dann léspass : dossi, dossou, anlèr, atèr par dsu, par dsou.

Si mi tronp pa i apèl sa lo test lo Pyéd’boi-Baum pars dann lalang bann zlman baum i vé dit pyé d’boi. Donk lo madam amontrèz la fine travaye in bon koupe de tan, kan bann zévalyèr i pass dann son klass donk i évalyé bann marmaye avèk bann pti déssin. Kan lé fini bann zévalyèr i évalyé — sa mèm zot travaye ! — é i di avèk l’amontrèz lo rézilta lé katastrofik. Mèm pa vin pour san bann marmaye la réissi lo test. Lo l’amontrèz i rèss bète épi èl i domann an èl mèm kossa èl la mal fé, kèl koté èl la tronpé… ankor bien èl la pa mète sa dsi la kouyoniss bann marmay ! Pars in pé nora fé konmsa

Astèr, èl i di akoz pa mète lo bann késtyon dann la lang kréol ? Sé sak èl i fé épi demoune i ède aèl, i done kou d’min — anfin in min i lav l’ote ! — Aprésa i rofé lo tèst é so kou issi pliss moityé bann marmaye i vien abou réponn bien bann késtyon… Lé korèk !

Oui mé astèr konbien marmaye la pass so bann tèst torte-torte, in bon pé santène biensir La Rényon é avèk kèl konklizyon ? Pétète va dir : marmaye kréol lé kouyon konm la line de mars lé ron, assiréman… Mi koné pa sak zot i anpanss de sa, mé sirésèrtin si lo marmaye néna franssé konm lang matèrnèl li doi gingn bien fé son tèst épi gingn in bon l’évalyassion — mé si son lang sé lo kréol ébin li lé bordé d’avanss… In bon rézon, pou fé bann tèst dann la lang bann marmaye i ansèrv é pa dann franssé sistématikman.

A bon antandèr, salu !

Justin