Figuir azot dann tan-la l’avé in santène marmaye téi sava lékol Boi d’Nèf é kan téi ariv kour moiyin dé osinonsa fin d’étide, bann paran téi tir bann marmaye lékol Boi-d’Nèf pou mète azot Sinte-Klotide in lékol pli koté, avèk la shanss pou bann zélèv gingn in sèrtifika kissoi pou rante dann in kour konplémantèr kisoi an sizyème osinonsa an sinkyèm… dé foi mèm kan bann fiye téi trape zot kinzan épi troi moi bann paran téi tir azot lékol pou okipe bann pli pti défoi mèm pou maryé.

Donk in zour mon momon kan èl téi vienn sorte lékol normal, banna la mète aèl diréktriss dann lékol Boi d’Nèf. In bon déssizyon, mé in gran lérèr imène pars l’avé in vyé lamontrèz téi koné pa lo b-a-Ba dann son métyé ; té pa in bone déssizyon pars toute sak téi konte dann vilaz la monte in kabal konte la diréktriss nouvèl téi vienn arivé.

Mé arien, la ptite madam épi son mari la désside mète azot o travaye.

Lo mari téi okipe la kontabilité, téi okipe amenn manzé la kantine pars momandoné manzé l’avé poin. Si zot i lir Bayalina dann Témoignaz zot va konprann koman lé shoz téi marsh dann tan-la. Madam la diréktriss té okipe fé travaye son bann zélév la somenn normal épi mèm lo soir, défoi lo zédi matin, défoi dann vakanss… si tèlman k’inn ané mirak néna marmaye la komanss pass sèrtifika…

Pa in bonpé, mé dé-troi é sa téi shanj lo limaz lékol Boi d’Nèf. Défoi mèm konm té loin, par raporte Sin-Dni la vil ; lo mari téi mète marmaye déyèr moto pou alé pass légzamin. Défoi mèm téi mète marmaye dann kamion épi sa té i pèrmète bann marmaye pass zot légzamin — mi diré pa dann bone kondission mé dann kondission akséptab.

Zordi sé lo dis é lo dismars sé lanivèrsèr monm momon amontrèz lékol Boi d’Nèf. Zordi èl lé fine pass l’ote koté : travaye la iz son santé, la kabla bann moune la fatig ali, si tèlman in zour èl té blizé arète travaye é nou son bann zanfan nou la suiv aèl dann son maladi k’téi fini pi, mé sir ké la maladi téi sar gingn konte èl. Mé bann losson èl la done anou étan vivan, sa sé kékshoz nou la pa obliyé.

A bon antandèr, salu !

Justin