Alor mi di dann mon tète épi dann mon kèr, kossa i lé so léspri Paul Vergès-la ? Koman sa i manifèste, kèl fasson ? Pou kossa madame la, la di son kozman dsi léspri noute gran kamarade la fine tourne toute bann paz son liv la vi dsi la tèr. Mi di pa li lé mor pars ou lé mor pou vréman kan na pi pèrsone pou majine aou é la pa lo ka.

Mi vé pa parl léspri dann sanss limour, lo kozman wi di pou fé sourir la boush é Paul té i manke pa non pli so léspri-la… Mi trouv bien partazé par in bonpé rényoné. Non mi vé parl léspri dann sanss-la. Ni pé rapèl sak Laurent Vergès téi di : nou lé pa pliss, nou lé pa mwinss, réspèkte anou. A i vré dir la pa pars nou lé pti ké nou néna pti droi é noute droi i doizèez égal sète toulmoune i doi an avoir dsi la tèr. Alon apèl sa léspri l’égalité avèk la zistiss.

Astèr nou la fine anparl issi mèm lo liv « D’une ile au monde » dann sanss noute péi, momandoné té in vré laboratoir pou tèste bann solission nouvèl pa solman pou li mé pou lo monde antyé. A !! Mi antan tré bien inpé apré panss bann rényoné shoviye la fine gonflé. Akoz ? I fo lo moune la shoviye lé gonflé pou anparl bann zapor in ptite zil konm nou i propoz ; l’imanité ? Mi panss pa, mwin lé mèm sir sé lo kontrèr.

Sirésèrtin si limanité l’avé ékoute in pé pliss bann pti, bann fèb, bann pa nonbré, dann sak zot i propoz, dann sak zot i vé é dann sak zot i vé pa, lo monde noré pa été konm li lé zordi : farfouyé, pèrdi rante dë solission, viv osinonsa disparète. In vérité élémantèr mé si i tienbo konte de sa, néna moiyin pou moiyéné, néna ankor do koi limanité pou progréssé.

Afors ékoute Paul Vergès kozé, afors lir son bann zékri, mwin la fine konprann in n’afèr sé ké léspri Paul Vergès, mèm si ni konpran pa toute sak li di anou, sé kékshoz préssyé pou l’imanité... Bone shanss madame Sigrid Gerardin, mwin néna konm linprèssion oute pti sézour shé nou, la pa in séjour pèrdi ni pou ou, ni pou nou. Bone shanss méssyé Desfontaine épi toute son list kamarade.

A bon antandèr, salu !

Justin