Médam zé méssyé, la sossyété, koz avèk mwin sé koz èk in kouyon mé sé o pyé d’lo mir k’i oi lo masson.

Mézami zot i koné dann séga rényoné i anparl souvan la rake épi son bann mové léfé dsi sak i boir.Dann somi lo mo Daniel Honoré ni pé lir. « Boir la rak mé boir pa léspri ! » mé koman fèr in n’afèr konmsa …. Mi oi pa. Mi rapèl ossi in shantéMadoré téi di konmsa : « Kan lo ronm lé dann boutèye li bouz pa vréman mé kan li la rante ann-dan li lé pi parèye ». In n’ote shanté té i di : « lo ronm lé pa bon mèm ! », é néna ankor in bonpé konmsa

Astèr pou arvir dsi noute kozman ni koné bonpé dmoune i sèye bataye kont ladikssion lalkol é mi panss sa in bon konba pars sa i fé d’tor dann bonpé famiye rényonèz é sak mi yème pa sé lo pèrte kontrol dsi soi mèm é sa i ariv konm mwin la marke an-o la défoi san ké la pèrssone la boir bonpé.

Alé ! mi arète tèrla pars mwin la poin sipèr pouvoir pou dérake mon bann konpatriyote mé kissa k’i koné in zour pétète va trouv in vakssin pou sa.Alé ! i artrouv pli dvan, sipétadyé.