Mwin pèrsonèlman mi koné sak kominiss i propoz : in gran diskission rante toute bann fors viv épizapré si lé nésséssèr in modifikassion pou alé dann sanss in plan fé par bann rényoné pou bann rényoné - biensir ni parl pou La Rényon par rapor la sityassion noute péi ké ni koné dopi lontan. Pou mwin sé la rézon mèmk’i komann pou fé konmsa.

Astèr, zordi, mi vé pa diskite dsi lo fon d’lafèr mé sinploman dsi la pèr i pran in pé kan i di i fo shanj kékshoz sirtou kan i parl la konfyanss ni pé avoir, par raporte nou mèm kan ni vé konstrui noute lavnir. Sé konm k’i diré in pé la pèr kan lokazyon pou fé noute l’avnir i prézante dovan nou… Mézami, mi panss kant mèm déssèrtin i doi dir dovan zot glass, sansa dann sogré zot lintimité, lé pa possib ni rèst konm ni lé, paralizé par raporte noute dévlopman ékonomik, noute égalité sossyal, épi noute protékssion anvironemantal.

Mwin la konu bann rényoné pli kourajé ké sa, kissoi dann la lite bann maron l’améné, kissoi la lite bann rényoné l’améné pou gingn l’égalité sossyal, kissoi noute bann bataye kiltirèl, bann bataye pou noute lang, pou noute lidantité, mwin la konu bann rényoné kouraz dann toute konba nou l’améné é pa arienk zordi... An atandan la roflékssion lé z ‘inn épi lé zot…

A bon antandèr salu !

Justin