Mézami si in moune i amontr amwin inn pèrsone épi i di amwin sa lé intélizan san pour san, mi kroi pa li. Si i di amwin ala in moune li lé kouyon san pour san, mi kroi pa li non pli.

Pou kossa ?

Pars pou mwin dann in moune intélizan néna forsséman in koin li lé kouyon… in zour in doktèr la di amwin li néna in poul mé li na poin kok donk li la pèr son poul i ponn pa zamé ; mwin la réviz mon lopinyon dsi son sipèr intélizanss.

In zour mwin la vi in moune téi pass pou in kouyon é mwin la vi ali kass in ni guèpe avèk la min alé oir mi gingn pa fé sa mwin. Mwin la panss si lo boug lé kouyon, kékpar li néna son par d’zéni.

Astèr si la sossyété i ziz aou par lo bann gran gran diplôme ou néna é pa pou out kapassité tir in ni guèp avèk la min lé sir néna inn lé intélizan é l’ote lé kouyon !

Mi kite azot rofléshir la dsi é ni rotrouv pli dvan, sipétadyé.

Justin