Mé alon porte antansion : si ni di sak mwin la ékrir an-o la, sa i vé dir i fo pa fé l’éta in prossé dann son l’intanssion, donk si li fé in l’érèr dann son apréssaysion sé pars li konpran pa bien lé shoz dann l’outre-mèr, mé mwin pèrsonèlman mi obliye pa l’intanssion d’mal fèr kissoi pou ranfors in sistèm léksploitassion, in sistème l’opréssion pars fransh vérité nou lé pa dékolonizé a fon san pour san. Sé tan issi nou la di sé La cour dé konte k’i fé toute in zimnastik intéléktyèl pou bien fé konprann anou i fo siprime l’octroi d’mèr pars sé in falktèr inportan d’la vi shèr... mézami souvan dé fo i fo ni ékoute noute moune anou - pa toultan mé so foi issi oui — pars i fo konète kossa l’octroi d’mèr i anssèrv é la TVA sak li ansèrv galman.

Ièr soir mi antan Huguette Bello apré dir dann la bouklier Qualité prix na poin bann produi lé toushé par loktroi d’mèr, mé in bonpé ni pèye la TVA dsi é mwin la mèm lir par so moiyin-la bann konsomatèr rényoné i anpèrde six san million l’ero-sa lé pri dann noute posh… L’octroi d’mèr, ni pèye pa sa dsi 1200 produi d’base donk la pa li k’i anshéri lo kou d’la vi. Anpliss ké sa sé nou k’i shoizi bann produi pou mète l’octroi d’mèr dossi é si ni shoizi bann produi-la la pa pars ni vé anpèsh noute prodikssion i dévlope - pars sansa ni tir in bal dann noute pyé é ni kondane a mor toute noute prodikssio intèryère.

Sé la ké mi arète zordi sinploman pou dir défoi l’éta épi son bann koko prope i fé zérèr é bann zérèr-la i fé anou d’tor mé défoi lérèr él lé vouli é sé pa in érèr ditou, mé in moiyin fé pèrde anou an nivo d’vi donk sak mi apèl in movèz intanssion é la pa arienk in n’afèr d’planète.

A bon antandèr, salu !

Justin