In néstan avan lo mèm group té apré parl Air Austral é lo tro d’sakrifiss bann kapitalist ni pé batiz konprador téi domann bann travayèr l’antropriz é zot téi di lo bann travayèr la fine si tèlman doné, lé l’èr pou alé rogarde in pé la zéstyon lantropriz é koman bann mové zéstyonèr la mète la sossyété atèr. Taye la lène dsi l’do bann travayèr sa lé pa késhoz à fèr dann in sityassikon la konpagni i koné.

Pèrsonèlman mi panss lo group l’avé rézon, mé solman an parti pars kèl sé lo bit dann inn é l’ote ka — malgré toute sak i pé roprosh banna é ké lé zistifyé — mwin la di mon bann kamarade d’apré mwin i fo ni rogarde dann so bann zafèr épi d’ote la fass kashé é la fass kashé an vérité sé lintanssion, kass lo rényoné kissoi kapitalist, kissloik travayèr, kissoi robèl. Ni pé atann anou shak foi lé possib gouvèrnman franssé va kass lo rényoné é sa sé kékshoz lé vizib konm lo né dann milyé in figuir.

Kan ni rogarde lo doi olèrk rogarde la line lo pouvoir néo-kolonyal i ri pars lènmi kashé i avanss maské é firamézir ké valé, li va suiv son lign : zok lo rényoné shak foi sar possib é sirtou si lo rényoné néna dé shoz pou roproshé. Donk opliss li néna dé shoz a roproshé opliss li sar kassé fassilman-opliss nou va rogarde lo doi kan lo saj v’amontr anou la line.

A bon antandèr salu !

Justin