Médam zé Méssyé , la sossyété koz èk mwin sé koz èk in kouyon mé sé o pyé d’lo mir k’i oi lo vré masson.

Mézami zot i koné issi manzé sa lé inportan é la plipar d’tan, kan i gagn, i lèss pa in moune vante vide. Larzan ou pa sir gagné sirtou avèk demoune néna pwin tro d’moiyin, mé manzé sa i pé partazé .Sé konmsa ké noute kozman an-o la sé in provèrb an parmi sak lé lo pli réspékté.

M’a rakonte azot in n’afèr : in zour mwin la rante dann in kaz mon famiye l’avé nyabou fé dsi in térin té mon papa. Kan l’ariv pou la rantré mon bèl-mèr la di amwin-el l’avé konm révé-Donk èl la di amwin dann l’èr manzé in moune v’arivé.Mèm si zot i koné pa li i fo donna li in pla manzé.

Sé konmsa k’la éspassé é l’èr pou manzé, in moune l’arivé, nou la done ali in pla manzé é li la manzé é li la parti san di arien, san di mèrssi, konmsi son passaz lété programé…Mwin na pwin arien pou mète la dsi mé mi invite azot kant mèm pou réfléshirla dsi.

Alé ! Ni artrouv pli d’van, sipétadyé.