Biendir li la di oui, mé son réponss té in pé difissil pou doné, in pé sèk-sèk sanm pou mwinsirtou ké an dirèk néna in plantèr la ésplike pou kossa li abandone la kiltir kann é mèm pou kossa sète ané li abandone son rékol o pyé pars li lé fatigué pèrde larzan dann kann dopi dé zané

Mi panss si lo préfé téi lir in pé Témoignages li noré dé shoz a dir é pa arienk in pti pé- mi sava pa dévlope in réponss mé noute bann léktèr i koné sirman in réyon dsi sète afèr-la...

Mon bann dalon mi pé dir azot tazantan kan mi vé konète koman i lé la prodikssion kann dann bann péi di monde ébin mi sava dsi linternet é mi domann ali pou Cuba kossa banna i fé avèk kann, parèye pou lo Brésil, parèye pou l’Inde, parèye ossi pou la Thaïlande, pou Maurice épi d’ote ankor.

Pétète zot va domandé pou kossa mi sava dsi linternet pou oir lo lévolission la kiltir kann in pé partou dsi la tèr- noute zoinal témoignages i di amwin toute pou sak i éspass issi shé nou pars ni koné la plantassion kann sa sé kékshoz lé plisk’inportan pou noute lagrikiltir, pou sak ni fé avèk-pars konm mwin la fine dirkann la pa solman lo sik mé in kantité ko-produi.

Astèr m’a dir azot in n’afèr :dann in télé nassyonal mwin la avèye in roportaz dsi Cuba-an kriz koméla konm zot i koné- é té apré parl dë gran rishèss pou lo péi : bann koktèl épi bann sigar. Pa in mo pou anparl lo blokaz lékonomi par bann zamérikin, pa in mo dsi bann réalizassion dann la médssine , lindistri médikaman,lalimantassion bann zanimo épi d’ote shoz ankor.

Mézami zot i koné tazantan kan bann gran média lé indijan dsi linformassion, i vo myé ni sava rode par nou mèm pou nou suiv lo laktyalité in pé konm k’i fo.

A bon antandèr, salu !
Justin