Alon kalkil in kou : sé linsékirité k’i vien an promyé sansa sé la povreté. Si linsékirité i rogarde toulmoune, mi panss la povrété i rogarde toulmoune ossi. Donk toulmoun i doi réini pou fé in vré plan pou sirmonte la povrété mèm la mizèr… Mwin lé pa konte sak zot i di, mé mwin la zamé antann dir toute bann zélu la fé in fron komin pou lite konte la povrété. Poitan oila in koz k’i mérite noute toute i done la min pou fé disparète sa.

Si mi di azot i fo lite konte la fain, lite konte lo mové kalité lojman, la movèz santé demoune na poin laz pou ète malade, lite konte in mank néna dann la kiltir, dann la formassion épi dann linstrikssyon sa sé in bann mové zafèr sa-i pé mèm dir ni artourn dann sa sé kékshoz k’i rossanb lo sète plé l’ézipt.

Astèr zot i pé di amwin si néna linsékirité nora forsséman la povrété. Dann in sanss zot néna in pé rézon : linsékirité i anpèsh in sirkilassion lib, i anpèsh bann travayèr fé sak zot néna pou fèr d’apré kontra, i anpèsh demoune bien soign azot é mi pé ète dakor… mé mwin lé pa dakor san pour san.

Solman zot i pé dir amwin si ni pé sirkilé, si médssin i pé soigné, si marmaye lékol i pé aprann zot losson, si bann propriyétèr lé pa ménassé dann la jouissanss zot bien zot i pé assir amwin ké la povreté va komanss disparète… Si zot i di amwin sa, mwin sar pa dakor pars zistoman nou sar dann la sékirité an aparanss dann la réalité in linsékirité déguizé.

Alor médam zé méssyé, la sossyété, zot i vé lite konte linsékirité alon lité, mé alon done la min noute toute ansanm pou lite kont la povrété. Sof mon réspé zot i panss néna in prézidan pou bann pov, néna in gouvèrnman pou bann pov, néna in lassanblé pou lite konte la povrété ; alor ? I fo lite konte linsékirité OK mé la lite konte la povrété kanssa li komanss ? Kèl moiyin li bénéfissyé ? Kèl plan pou siprime ali ?.. Napoin ! Ébin wala in gran karanss dann bann zafèr piblik.

A bon antandèr salu !

Justin