An vérité wi pé pa z’ète indépandan si ou lé dépandan pou larzan é La Franss ansien puissanss kolonyal in bonpé réjyon dann l’Afrik la mète zot moné nassyonal sou kontrol lo trézor franssé… Nou la fine anparl sa mé zordi ankor néna démoune pou vante la zénérozité lo lansyène puissanss kolonyal mé in lansien Prézidan i apèl Jacques Chirac la rétabli la vérité é la vérité sé ké La Franss la anrishi aèl avèk la rishèss son bann zansien koloni li la détourné..

Mé Chirac té la droite an politik é zot i pouré dir bann gouvèrnman la droite la ésploite bann koloni mé a bien rogardé la droite té pa toussèl, lo santre avèk bann gouvèrnman téi rovandik zot konm étan lo santr, épi la gosh la pa fé arien pou kass lésploitassion kolonyal — Lo jenn prézidan Macron la pa fé otroman lé shoz mèm li la fé in déni d’lésploitassion kolonyal… é avan li néna bann zom de progré — konm i di — la fé la mèm shoz.

Pou kossa ? Pars inn foi o pouvoir, bann gouvèrnman épi bann prézidan la konporte azot konm défanssèr la grandèr d’La Franss.. Na dé troi zour mwin la lir in lartik, dann zoinal épi lartik-la téi di « sépa si La Franss va aksèpe sak èl i lé zordi, in moiyin péi, mèm in pti péi ? » Sa i mérite diskission pars zordi ni oi lé shoz apré shanjé é pli vite ké ni kroi — pou in bon linformassion mi panss i fo lir Témoignages é zot va rann azot konte par zot mèm lo shanjman.

Mi koné pa si bann fors politik an franss va aksèpe rovoir la sityassion zot péi… kissoi léktrème droite, kissoi la droite, kissoi lo santr é kissoi la gosh èl mèm osinonsa zot va fé la sinte alyanss pou lésploitassion bann zansien koloni. Mi doute pa k’in n’afèr konmsa sar difissil pou gardé mé in pé i dékouraz pa é si i kontinyé lé possib ni rotrouv lo tan bann konplo, bann zanprizoneman, épi bann kou d’éta, épi la guèr konm la fé dann la Libye pou anspèsh in véritab indépandanss bann zansien koloni épi galman zot dévlopman réissi.

In zour mwin té apré ékoute Paul Vergès apré komante laktyalité dann biro témoignages é li téi di an rogardan lo léshikkyé politik La Franss — téi vienn fé zélékssion — kan wi panss la bourzoizi franssèz i pé apiye ali dsi prèss lo total lo lémisikl dopi lékstreme droite an passan par la droite, épi lo santr épi ankor la gosh i pé dir son zintéré lé bien défandi. Mi panss lé a rofléshir la dsi.

A bon antandèr salu !

Justin