Zordi mi parl ankor in kou kann pars na poin in prodikssion lé si bien émé épi si bien malémé ké noute prodikssion kann. Astèr mon souvnir :

Dann tan-la mwin té i abite Boi d’nèf Sin-dni é mi rapè in vizite lo bon doktèr Raymond Vergès la rann anou apré in rényon li l’avé fé dann lo vilaz. L’èr-la mon papa té apré ralé konm souvan pars konm li di lizinyé i pèye ali son kann épi lo bann sou-produi. Sitèlman ké kan la koupe i ariv bann plantèr l’avé pankor gingn toute lo règloman la koupe l’ané d’avan. D’apré sak mi rapèl mon papa téi di lo bon doktèr, l’izinyé i dovré pèye bann plantèr son kann an in kou épi fini avèk sa.

Mi rapèl bein lo doktèr la bien rogarde mon papa épi la di ali : « Félix néna tro la rishèss dann kann pou domann in n’afèr konmsa pars majine in pé si lo produi i apartien lizinyé toute sak li va tir d’dan lo plantèr i gingn ar pa arien osinonsa prèské »… Konm sak i éspass koméla.

Lo tan la passé, nou la gingn lir in pé la dokimantassion dsi kann é sak ni koné sé ké kann sé pa arienk dosik mé in gran kantité produi i pé tir d’dan é sirman raporte lo péi bonpé pliss ké la valèr son sik. Dèrnyèr foi noute zoinal Témoignages la anparl sa, téi anparl plizyèr santène ko-produi, pétète pa fézab toute an mèm tan mé fézab pou in bonpé rantre zot.

Alor in pé i di i fo pi plante kann. Dizon i domann anou tyé noute poul zèf an or é bann plantèr i koné bien sa.la pa in dékouvèrte pou zot mé in mémoir ravivé-rafréshi.

A bon antandèr, salu !

Justin

NB kan Témoignages téi tir dsu papier, tazantan li téi tir in niméro spéssyal dsi kann é sa téin n’afèr mwin téi garde sa avèk mwin pars l’avé arienk Témoignages pou mète an valèr note kann.