Kan i fé toussala, i prétan sé pou diminyé lo shomaz. Zot i pé dir koman an diminyan lindamnité d’shomaz i pé mète pliss demoune dann travaye ? Sinploman sé inn krak, é la zamé amonrtre in tik-tak konmsa i mète pliss demoune dann travaye.

Oussa i lé la vérité ladan ?

El i pé z’ète sinpléman sinike. I fé sa pou koupe lindamnizassion, apré lo shomèr li débrouye son kari toussèl, li fé avèk. Osinonsa i oi lo shomèr konm kélk’in i vé pa travaye é i di si i manke ali l o nésséssèr li v’alé travaye, mé dann in sityassion travaye lé rar konm korn lapin mi oi pa oussa li sava trouv travaye.

Mé i pé dir ankor moinss i done bann shomèr, pliss sa i rante dann kèss l’éta é an parmi l’moune, mèm sa ki travaye i fini par rézone konmsa. I oi zot kolèg konm in moune apré pirj larzan l’assedic. Pli pir sé kan wi antan bann marmaye zot ossi i rézone konmsa… Alé oir souvan dé foi sé la famiye bann travayèr ki siporte lo poi bann mové déssizyon.

Alé ! In n’afèr ni doi dir anou : kan i raz la pinte bann travyèr épi bann shomèr sé la popilassion k’i soufèr dann in sityassion sé bann travayèr k’i siporte lo poi d’in loi inzist.

Mé lo kapiatalism néna plizyèr korde avèk son l’ark é an parmi néna l’ède sossyal, épi néna ankor bann zassossyasion i gingn l’ède éropééne épi sète l’éta pou partaz avèk bann famiye shomèr avèk la onte épi la soufranss anpliss.

A bon antandèr salu !

Justin