Mézami kozman mwin la shoizi pou anparl zordi mwin téi antande ali kan mwin lété marmaye — mé mwin l’avé déza mé konéssanss kant mèm. Mi panss sé ma momon l’avé ramenn sa dopî lo sid… Son famiye téi sorte laba.

Mwin, pèrsonèlman, mi ansèrv sa pou anparl larzan lo moi. Mézami zot i koné lo moi sa lé long sa : mèm lo pti moi d’févriyé néna 28 ; sansa 29 zour é lé zot si la pa 31, sé trante. Lé sir lo moi lé long pou in bonpé d’moune issi La Rényon, dir si in famiye na pwin tro lo mwayin pou moiyéné.

Mi rapèl néna lontan mèm mwin l’avé in vyé famiye téi parl la fain dann tan lontan é li téi di ; pou komanssé i manz mayi fin, épi aprésa i mayi d’ri, aprésa ankor néna lanmsime épizapré la zèl, mé la zèl sa i manz pa… Sirésèrtin sak téi di sa li l’avé konète la fain é li l’avé soufèr la fain é sa lété in gran problèm pou la famiye.

Astèr i fo ni arète pa noute réflékssion dsi loproblèm la fain é biensir koman fèr pou zoinn lé dë boute par l’milyé pou sak lé ankor an difikilté.

Alé ! Mi kite azot rofléshir la dsi é ni rotrouv pli d’van, sipétadyé.

Justin