Konkour lo pli gayar kozé dann kréol rényoné

23 mé, sanm Justin

Mézami, lindi passé, in bone konéssans la vni Lakaz épi la di amwin, el la pran in zour konjé éksopré pou alé in konkour lélokanss dann la lang kréol La Rényon. In gayar nouvèl assiréman mé souvan défoi kan wi aprann in nouvèl wi mézir pa toutsuite pou toute suite linportanss sa néna. Alor par politèss mwin la félissite aèl épi lé shoz l’arète la.

Mwin noré pü, noré dü mèm, domann aèl kissa i roganiz sa, kèl zour i fé sa, anfin domann ransègnman konmsa o moinss mwin noré fé in oté la dsi, késtyonn bate in pé tanbour dsi lévènman mé mwin la pa fé… Asoir, l’èr mwin l’apré fé mon modékri mi koné pa si l’afèr la fine éspassé é si la fine éspassé kissa la gagné é si son bon kozé lété rékonpanssé kon i fo.

Dann télé sirman la fine parl lo konkour lélokanss… dann la lang franssé pars banna i doi mèm pa panss in konkour lélokanss dann la lang kréol i pé fé l’évènman la dsi é si i vo la pène pass in linformassion… Mé lé vré mwin lé mal plassé pou krétik azot par la fasson mwin ossi mwin la pran l’évènman sou la form in méssazèr la rann amwin vizite in lindi fèryé dann l’aprémidi.

Yèr soir mwin la rogarde dsi linternet pou oir kissa i roganiz konkour-la é mi panss sé komité d’la kiltir pou lo dézyèm foi sète ané. Mwin la pa trouv kan i fé é koman va déroulé… Mi roprosh amwin, kréoliss niméro in, prann lé shoz konmsa donk pa fèr pliss ké lé zote kansréti pou gingn ral zot zorèye apré.

Mwin la panss kozman mwin la di in bon kamarade lo parti kan li la di amwin li la ékrir in liv dsi son famiye… Dann la lang bann franssé. Mwin la di ali, si in zour noute lang kréol i gingn malèr é si èl i disparète mi koné kissa lé résponsab sa. La pa bann zènmi noute lang — zènmi sé zènmi — mé son bann fozami. Ala l’èr ki lé mwin lé blijé marke mon nom dsi la liste demoune la pa porte sokour noute lang kan pétète èl l’avé bien bézwin.

Kossa sa i fé si zordi mwin la ékoute in gayar shanté dsi noute lang. Kossa sa i fé si bonpé zékrivèr la pran zot klavyé pou ékri in shanté an kréol. Kossa sa i fé si mon radio la pass gayar shanté… si mwin pèrsonèl mwin la pa fé lo minimome sak mwin noré pu fèr, mwin noré dü fèr. Sé ma fote, mé la pa pou sa zot i doi santir azot konm pa résponssab zot ossi dsil’afèr mwin la marke an-o la.

A bon antandèr salu !

Justin

Padport

Signaler un contenu

Inn modékri, inn ti lavi, inn komantèr ?