Zordi ankor mwin la lir in kozman la Prézidante Konsèye réjyonal téi di l’éta lé pa in si bon zéstyonèr ké sa pars li fé siporte lo poi la TVA par bann pli pov dann la sossyété rényonèz : par ébzanp dsi lo boukliyé kalité-pri in taks pliss 8 pour san é sa i rèss pa issi i rosava an Franss.

Lo Prézidan Konsèye départmantal i di l’éta i vé la souvérènté alimantaire, mais si lé pa possib protèj noute bann prodikssion konte bann zinportassion, mark fouti dsi lo souvrérènté alimantèr.

In mèr i di, konmsa loktroi d’mèr i kouvèr 30 pour san son bann dépanss fonksyoneman é si i siprime li oi pa koman li — osinonsa sonn siksséssèr — va gingn garde son pèrsonèl kan in pé v’alé la rotrète.

In n’ote mèr, sète Sin Philippe i di loktroi d’mèr sé 60 % son bidzé d’fonksyoneman alor oir in pé anka d’sipréssion.

Mi antan in pé i di l’éta i vé konomiz dis milyar l’euro é sé pou sa li propoz ranplass loktroi d’mèr par in TVA réjyonal avèk lo mèm finalité ké la TVA nassyonal donk lo rotour an Franss pou lo produi d’la taks. Sa i fé dir amwin plizyèr réflékssion :

- inn si zot i pé antann pou di non, akoz zot la pa antann pou dir kossa d’apré zot lo pèp rényoné i vé. Ziska zordi la di va fé, mé la pa fé. Ni rèv ankor in plan rényoné par bann rényoné pou bann rényoné.

- l’ané 2012 Paul Vergès la mète an garde konte in l’éta rapass i vé mète la min dsi bann rossours lokal é la pa fé l’inion sakré la dsi ; la fé konmsi Paul téi koz initil.

In pé i apèl lo l’éta pou konssèrté ? Mon dyé ségnèr zot i koné kossa gouvèrnman i apèl konssèrté ? Sinploman li réini lo monde épi li di sak li vé é si ou lé pa kontan wi pran konstan. La pa konssèrté i fo, sé lité donk sé pa lo mèm zafèr.

Noré noré ankor pou mobilizé par in légzanpe sinp : l’éta i fou pa mal tir larzan dsi bann pov, nou issi ni rofiz in manyèr fèr konmsa pars fèr sa sé agrav la mizèr.

A bon antandèr salu !

Justin