Néna in n’afèr i fo ni tienbo konte sé la démografi : fitintan bann prodiktèr Madagascar lété i ésporte deri mé antansyon, lo tan mi anparl azot la lo péi, gran konm li lé, l’avé par-la sink million d’moune. Koméla néna par-la trante milyon d’moune é la popilasion i goumante si tèlman vite bann projekssion i done in popilassion bonpé pli nonbrèz : sinkante million lané 2050, san million an 2100.

In n’ote zafèr, lo péi té kolonizé é la prodikssion té rante la min bann waza, si tèlman bann malgash zot mèm l’avé poin manzé konm k’i fo. Donk si ni pé dir in n’afèr sé d’pa fyé dsi noute grann voizine pou vann anou son ri pars li va komanss par nouri son prop popilassion.

Sa lé vré pou Mada, mé sa lé vré pou bann péi konm l’Inn, la Thailande, lo Vietnam épi pou d’ote. Sé pou sa i fo ni fors dsi la plantassion pars momandoné bann péi prodiktèr lé kapab konte dsi zot pou nouri zot popilassion an promyé avan fors dsi linportassion-lésportassion… A mwinss k’in pé i désside spékilé pou fé larzan sinploman.

In prézantatèr la poz in moune dann l’assossyasion de ri in késtyon é la di ali : pou kossa i vé plante deri. La pèrsonne la réponn, pars ni manze deri toute noute vi é nou la zamé vi in pyé d’ri. Sé in ésplikassion, mé l’ote sé ké ni doi planté pou pa z’ète privé noute nouritir prinssipal in momandoné.

Sak i fo ni di an nou-mèm : nou néna la tèr, nou néna delo, nou néna plantèr, kissa i pé anpèsh anou plante noute ri pa an totalité mé an parti kant mèm mé sak i pé anpèsh anou sé le lorganizassion kolonyal é sa sé in lènmi pli danzéré ké ni kroi si ni lite pa konte li.

A bon antandèr salu !

Justin