La fasson in pé i trète bann plantèr té !

8 avril, sanm Justin

Mézami dopi siklone Bellal la passé, i fo ékoute kozman in pé i trète bann plantèr. I diré néna in vré dézamour rante bann konsomatèr épi bann porodiktèr. I diré bann konsomatèr i roprosh bann plantèr vann zot léguime in pri lé pa abordab ditou pou zot.

La plipar d’tan dann bann radyo demoune i dénonss lo pri tro shèr bann léguime é an parmi i dénonss lo pri lo shou, lo pri l’ail, zognon, tomate. Lé vré tanzantan bann pri léguime lé si tèlman shèr k’sa i done pa ou anvi ashté.

Mé oila souvan dé foi demoune lé pa kapab dir oussa marshandiz-la i sorte sof si wi sava fé oute bann komission dann grann sirfass. Pars dann bann grann sirfass i di aou oussa lo marshandiz i sorte : si i sorte La Rényon, osinonsa l’Egypt, Madégaskar osinonsa dann d’ote landroi.

Sak le moune i viz sé lo bann produi i sorte La Rényon… Pétète pars kréol i fé ankor pliss konfyanss bann léguime La Rényon épi i méfyé sak i sorte déor. M’a dir azot, mwin ossi lé konmsa pars mwin lé méfyan par raporte l’inportassion.

Mé la pa pou sa i fo malparl bann plantèr noute péi pars koméla lé possib ékipe azot tèl sorte zot i gingn protèz zot léguime par raporte siklone épi par raporte bann shanpignon mé ziska zordi zot na poin lo moiyin protèz zot plantassion…

Mé i égziss pa in vré volonté rényonèz pou produir, pou protézé, pou favoriz in sirprodikssyon. Toussa i égziss koméla, mé fote in vré volonté rényonèz, déssèrtènn foi nou lé dann l’inpass konm lo plantèr lé dann l’inpass, konm lo bazardyé lé dann l’inpass avèk okin solissyon inn pèryode l’ané.

Alor ? I fo bann rényoné i rankonte azot, i diskite épi i mète bann bon solissyon an plass… A kondission ké bann trété l’Érope i amiz pa li pou mète anou dann l’anbara pars sé sa k i ariv koméla souvan dé foi.

A bon antandèr salu !

Justin

Padport

Signaler un contenu

Inn modékri, inn ti lavi, inn komantèr ?