Limité ? Lé ga i fo fé antanssion avèk so Macron-la épi son bann zouav. Donn in pyé zot i pran lo karo. Zot ossi zot i ral dsi lo kordo d’konpétanss é zot i fé dir la loi sak la loi i di pa. Pa pli loin ké pou lo 49-3 alé oir la loi i donn lotorizassion ansèrv tazantan é zot la ansèrv sa in kantité foi. Eskiz mon pardon lé ga : kan mwin té linivèrssité mwin la étidyé in kékshoz i apèl l’abus de droi — abizaz lo droi — é sa sé kékshoz lé pratikman or-la-loi.

Astèr si i lèss azot fèr mwin lé sirésèrtin zot i sava pa okipe solman bann zafèr kourante mé bann zafèr tou kour é i paré la fine komanssé : i rode toute bann loi la fine voté san voté-49 3- pou mète dann zoinal ofissyél épi konsidèr sa konm lé zafèr kourante. Apré kour déyèr an atandan…

Momandoné mwin téi panss kan na pwin gouvèrnman sé in bon n’afèr-in mal pou in bien, donk sa i évite anou bann mové loi pou mète anou dann malizé mé opliss mi kalkil, opliss mi oi k’avèk in bann konmsa ou lé bien an-nuiyé… Mi pé touzour di : « afors alé a lo, kalbass i kass ! » mé sa sé arienk in rékonfor pou mwin épi pou sak i pran plin foué bann mové loi i mète bann pti kolon an difikilté.

Astèr néna plizyèr mové kou lé an kour : par égzanpe néna la Kanaki-Nouvèl kalédoni zot i rofiz son déklolonizassion é mèm zot l’apré roganiz la scission dan lo péi. Afèr kourante ? Zafèr kourante ? Pandan s’tan-la kabri i manz salade é la répréssyon i abate dsi noute bann frèr kanak épi dsi bann néo-klédonien an zénéral.

Mwin ossi mwin la lir noute zoinal é mi oi kalité mové kou l’apré monte konte noute bann frèr é nou la pèr k’i dékartiye zot péi é ni koné pa si va fini trouv in bon solission pou zot mé sirésèrtin néna in bann mové zéni i rèss pa san konploté. Noute bann frèr i rèss pas an réazi mé La Franss kolonyal lé fèb avèk lé for mé for avèk lé fèb é la pa arienk koméla i fé konmsa.

A bon antandèr salu !

Justin