Lo Prézidan pou son par li lé pa la avèk sa. Li profite a-fon lo bann zé zolinpik épi bann milyar la mète ladan. La pa bézwin rode loin, rogarde solman télé é zot va oir ali apré fé bizou par issi par laba, apré félissite inn ou bien l’ot, apré larg in pti mo pou dir lo pèp franssé lé formidab é bann sportif sé lo limaz mèm lo pèp franssé an lor, an larzan épi an bronze. La nuite lonm la zourné i oi li apré fé son bann ronde an parmi toulmoune.

Astèr i parl bann zafèr kourante, mé bann zafèr kourante La franss, kissa i okipe sa ? Lo gouvèrnman démissyonèr mé tardra-viendra talèr in pé anparmi bann miniss va dépass la lingn rouz é apré avoir okipe bann zafèr kourante zot va okipe bann zafèr toukour… Mé la nou sar pa lwin d’in kou d’éta dofète. Sak in vré gouvèrnman i pé fèr in gouvèrnman démissyonèr i pé pa é sirésèrtin néna d’moune l’apré vèye sa kom lé dsi l’fé. Momandoné li monte, li monte épi li kapote dann fé.

Talér lé riskab inn-dé miniss i travèrs o rouz é i mète azot — vi k’na poin d’gouvèrman, a gouvèrné pou vréman konmsi zot l’avé in droi natirèl pou fèr sa. Astèr la mwin lé sir néna bann zékspèr va dir lo prézidan antanssion ! Mé wala lo pti prézidan li ékoute pa pèrsone é li panss li lé pli ékspèr ké lo bann zékspèr, mé antanssion, néna in zour i apèl domin.

A bon antandèr salu !

Justin