Mi rapèl mwoi d’juin kan la di la koupe sar an rotar in moi, mwin lété a d’mandé koman kékshoz konmsa i pé arivé alé oir shak ané la koupe i komanss tèl date épi i fini tèl date konmsi sa lété réglé konm papyé d’mizik é la, san prévnir d’avanss l’avé pwin kann pou koupé kan l’èr l’ariv pou koupé.

Sir é sèrtin bann plantèr téi prévien assé bann fassonyé épi bann zaktèr ékonomik — téi prévien azot pars l’avé kome in katastrof anonssé. Bann fassonyé lé péyé pou konète zot lé dépandan bann prodiktèr kann é san bann plantèr pa d’koupe kann, pa d’transformassion mèm si sa téi fé a-minima. Donk i transform in minimome é i négliz in bone parti bann ko-produi.

Astèr dann milyé la koupe toulmoune i apèrssoi lo rézilta sète ané sar ankor pli mové ké sète l’ané dèrnyèr épi sète l’ané d’avan. Si ni konte bien é si lé shoz i marsh konmsa ni sava vèr in koupe 1 200 000 tone kann alé oir momandoné nou téi viz lo dé million d’tone san zamé gingn trapé.

Lé normal bann sindika plantèr i domann in plan d’sokour pou kann épi pou bann plantèr mé konbienn tan in gouvèrnman nora bézwin pou konprann kékshoz konmsa — sak lé pa normal sé k’in prézidan i lèss dormir lé shoz konmsa san okipe bann problèm La Rényon épi bann problèm d’irzanss… dopi dimansh néna in gouvèrnman épi in miniss lagrikiltir mé konbien lo tan pou in moune déor pou konprann in sityassion konmsa.. Talèr sé la koupe 2025 lériskab d’ète ankor mové.

A bon antandèr salu !

Justin