Toute lé bien sof in pti kékshoz la shagrine amwin é mi panss zot ossi bann léktèr Témoignages, si zot la antann sa, sirésèrtin sa la pa fé plézir azot. De koi ni anparl nou la ? Momandoné lo téknissien la di késhoz konm sa : li la di, lé pa késtyon pou nou aviz in prodikssion 43000 tone — la kantité dori inporté dann noute péi —, mé aviz in prodikssyon deri d’kalité pou bann zagrikiltèr, pars i paré zot i aviz pa lotonomi alimantèr — épi li la panss kréol téi ékoute pa bien, l’èr-la li la di, li lé konte lotonomi alimantèr.

Zot i koné sa la fé rofléshir amwin in bonpé é mwin téi di dann mon kèr : ala in bon marmaye, li vanj pou argingn mète an plass dori dann noute lagrikiltir, mé oila ké lo mèm bon marmaye i di li lé konte lotonomi alimantèr… Kan wi kroi in konba idéolozik lé gagné, wi apèrssoi, toudinkou, wi ardéboul dann fon ranpar. Donk lo konba idéolozik lé pa gagné pou vréman… Pétète pars lotonomi alimantèr lé pa bien défini — i parl pa arienk lo ri mé toute in miks alimantèr pou zistoman trape sète afèr d’lotonomi alimantèr — pétète in pé la pèr sibir l’agréssion ké ni apèl néo-kolonyal é d’ote i shèrch a pa déplère bann konprador i viv dsi la boss lo pèp néo-kolonizé.

An guiz konklizion ni pé dir, lotonomi alimantèr, sa la pa in konba gagné d’avanss mé in konba i fo améné pars li sar long, li sar difissil, é mèm son bann partizan si zot la rézon, konte pa dsi bann profitèr pou dépoz lé zarm san ansèrv azot ditou — nou lé pa dann la nui di 4 aout lo kolonyalism.

A bon antandèr, salu !

Justin