Mézami, mi koné pa si zot la fini antann in kozman konmsa pars d’apré mwin li lé plito rar. Solon Lo gran Daniel Honoré dann son liv « somi lo mo » i di sa d’in moune i mégri mèm si li manz normalman osinonsa si li manz plisské son konte manzé.

Ziska zordi mwin la ézite anparl azot kozman-la pars pou mwin lo sanss lé pa klèr. A mwins ké ni mète sa dsi lo konte bann kozman an parabol pars lo kréol rényoné sé in gran parabolèr konm défin Peters téi di é la fasson lo kozman lé tourné sa i fé panss amwinn in parabol - dizon konm in limaz tayé pu fé sourir.

Ni pé dir galman i di kozman-la kan i parl in moune lé mèg san dir si li néna son konte manzé sansa si li napoin… Mi kite azot fé zoué zot limazinassion pars mi koné dsi so poinnvizé-la, bann léktèr Témoignages néna in gran kapassité é sré bon zot i partaz in pé sa avèk nou.

Alé ! Mi kite azot rofléshi la dsi é ni o pli dvan sipétadyé.

Justin