Lo prézidan koméla, méssyé Macron, li la pwin in majorité pou aplike son program donk li dissoude la shanm dépité apré k’bann zéléktèr la done ali in kou d’rèst trankil. Biensir konm dabitide li la pa prévni pèrssone, ni son bann dalon, ni son l’opozission mé konm sé son drou fé lé shoz an missouk, lèss ali fèr an missouk. Pa an démokrassi vi k’sa li koné pa.

Mé nou bann pti kolon nou lé a d’mandé pou kossa li fé sa astèr. Pou kossa par égzanp li la pa atann moi d’séktanm pou li fé sa. Pou pran demoune par sirpriz ? Promyé sirpri sé son promyé miniss épi son bann partizan. Donk sré par kalkil ! In pé i di galman sé par son gro kèr-mé sa na pwin dann vokabilèr franssé é néna arienk dann l’outremèr demoune i koné sa.

Alon pa rode pou kossa li fé sa koméla, ni trouv ar pa mé si par égzanpe bann milyardèr La franss l’avé di ali, Macron nou lé pi kontan avèk ou, i fo wi disparète pou donn la plass bann bon défanssèr lo kapital mé k’i avanss maské é sé lo ka lo RN soidizan pou lé pti an réalité pou bann kapital zot i ador konm lo vo an lo. Antouléka ni koné bien lo RN lé kapab kontante azot…

Mé nou bann pti kolon, nou ké Macron i malmène dopi sètan kossa ni fé ladan. Rante la pèst épi lo koléra, kissa ni shoizi ladan ? Ni vé ni inn, ni l’ote… é dann noute kèr ni mète a révé d’in troizyèm solission. Donk ni mète a révé d’in n’ote viktoir é ni domann la gosh débrouye aèl pou bate é l’iin é l’ote. Nou ossi noute koté ni zoué noute loto — antouléka laba dann La franss banna i fé konmsa..

Antouléka wala in moune lé prézidan ; li la fé konmsi li lété lo roi — pa solman sète La franss mé sète L’érop — é wala dann kèl traka li mète ali… Mé sa ni anfou, mé dann kèl ka li mète anou dann son zé d’biyar… Dizon ké dann toute zafèr lo pli pir lé zamé sèrtin é nou va oir lo rèst dann pa lontan.

A bon antandèr, salu !

Justin