Mézami, nou demoune la kanpagn, ni koné bien dsi fèye sonz néna in spèss vèrni k’i fé k’in fèye sonz i mouye pa. Zot i koné sa lé vré pou plime kanar. Si tèlman ké kan la plui i tonb, lo i koule an pèrl transparan é lo fèye sonz i san li lé bien. Lé vré ossi pou kanar avèk zot bann plime briyan.

Mé o fète ni parl fèye sonz, ni parl plime kanar mé nou l’apré koz dsi in provèrb nou la é i fo ni rode son laplikassion dann la sossyété imène. Ni pé dir kan i di in moune lé volèr, malonète, néna sak i vien rouz konm tomate-donk wi oi sa i toush azot !- mé néna ossi sak i fé konmsi dé rien nété. Pa pliss léfé dsi zot ké dsi fèye sonz osinonsa la plime kanar.

La pa pars zot lé pli onète, mé sinploman pars zot i s’anfou dsa. Trète aou, maltrètte aou zot i kass pa la tète-sansa zot va gingn maldotète.

Alé ! Ni artrouv pli dvan, sipétadyé.

Justin