Mi rapèl sa la spassé dann lé o la ri maréchal Leclerc dann Sin-Dni déyèr in libréri téi apèl La frégate, lo librèr lété in dirizan noute parti. Mi rapèl bien nou la rozistr ali o mwins dé troi z-èr d’tan é li la fé dovan nou lanaliz noute sityassion. Par l’fète mi panss zordi ankor plizyèr kamarade néna lo pti liv vèr nou la tir dann son lintervyou… In zour si liv-la i pass dovan zot é si zot i yèm la léktir ézite pa, lir ali é mi panss zot va konprann dé shoz konm noute pti groupe la konprann dann tan-la.

Sak li la di anou zour-la sé k’néna in doub kontradikssion dann la sossyété rényonèz : in kontradikssion kapitalist demoune i anparl bonpé é in kontradikssion kolonyal demoune i anparl pa tro sof lo parti kan li fé son bann kongré sansa son l’assanblé zénéral… astèr si ni anparl la kontradilkssion néo-kolonyal avèk d’in koté La Rényon é dan l’ote koté la métropol — zordi i apèl sa figuir sink koté, hégzagone si zot i vé.

Mwin lé sirésèrtin pou bonpé militan na pwin dë kontradikssion mé arienk inn é sé la kontradikssion kapitalist. Pou mwin néna dë konm mwin la touzour di an suivan lansègnman noute parti kominiss. Pétète i sré bon rovoir in pé noute lanaliz é sirtou bien étidyé sak ni apèl lo néo-kolonyalism pars li mèm lotèr si noute péi i ariv pa dévlopé korèktoman ziska zordi… an partikilyé noute lékonomi d’prodikssion lé bien an difikilté.

Sirésèrtin néna in sistèm i fo kassé é mi panss ni la gosh ni la droite an franss la pa fé lo néssèssèr pou débloke lo bann frin noute dévlopman épi sète bann péi loutremèr… Mi yèmré bien in moune pli kalifyé k’mwin — mi oi plito in group pou fé létide — i analiz in pé toussa konmsa bann jenn noute péi i gingn konstrui in parti osinonsa in mouvman anti-kolonyal pou mète anou dann shomin noute vré dévlopman é an partikilyé lo dévlopman noute bann flors mprodiktiv.

A bon antandèr salu.

Justin