La vyolanss i apèl la vyolanss, é lo gouvèrnman résponssab lé pa la èk sa !

18 mars, sanm Justin

Mézami talèrla mwin la pass koté in parking é mwin la vi plizyèr loto brilé. Pou kossa zot té brilé ? Biensir pèrsone i koné pa. Possib sé in késtyonn vanzanss ; possib sa sé in n’afèr l’ariv par akssidan. Possib lé sinploman volontèr é néna d’moune la rode défoulé. Mi koné pa ! Mi panss la poliss i koné pa non pli !

Mwin la romarke tazantan dé zafèr konmsa i ariv é la pa bézoin rode in rézon rassyonèl pars mi kroi lé pa possib trouvé. Amwinss ké lo sèl lidé rassyonèl ni pé trouvé sé ké demoune néna si tèlman problèm dann lo péi ké zot i kass zot i briz pou fé konète an-o lyé ké zot lé pa kontan lo fasson lé shoz i éspass.

Mé néna in lidé, mwin la lir d’issi d’laba sé ké l’éta la mète dézorde in pé partou dann noute réjyon é astèr li gingn pa fé arien pou fé rotonb la préssion si li véfé rotonbé… sak mwin lé pa sir. La pression lé for dann Mayotte si tèlman ké frèr ante frèr l’apré fé la guèr. Toute sak i sorte déor mèm si sé famiye koméla lé mal vi é lo pti péi lé konm in marmite kokote fèrmé apré shofé ziska… L’ésplozyon o boudikonte.

Néna in n’ote afèr demoune i di sé ké la prizon dann Mayotte lé tro pti par rapor lo nonb demoune kondané é l’éta i anvoye demoune La Rényon pou fèr zot tan é apréssa banna i rèss issi é la vyolanss lé né laba i fé kontajyon issi avèk la vyolanss i koné koméla. Mé antanssion, sak i di sa, i di sa san prèv. Biensir konm i di, nou la pa bézoin sa pou ésplozé nou ossi avèk toute l’inégalité toute lo dégré d’mizèr, toute lo dégré d’malkontantman demoune lé d’dan, mé si ni azoute in pé pliss va pète inpé pliss. Sé pa sak ni souète mé sé sak lé kapab arivé.

A zizé si i fé pa arien pou prévnirpars néna in vyé provèrb i di i vo myé prévnir ké guérir, mé sa sé in kozman la pankor rante dan la tète l’élizé konm dann sète gouvèrnman…

A bon antandèr, salu !

Justin

PadportIle de Mayotte

Signaler un contenu

Inn modékri, inn ti lavi, inn komantèr ?