Sa sé in n‘afèr la pa anpèsh amwin gingn diplôme mwin té i vé passé mé dann fon mon kèr mwin téi yèm pa fasson mwin téi fé pou aprann dé shoz é san plézanté mwin téi pass mon tan fé lo va é vien rante la lang an prété épi la lang fabriké. Défoi kan mwin téi travaaue in paragraf an franssé, apréssa ,dann mon tète mwin té i fé in roklonstrikssion pou oir si mwin téi konpran bien é si sa lété anrozistré dsi disk-dir mon mémoir.

Vi ké ni anparl la mémoir, mi rapèl in pé an parmi mon bann kamarade téi aprann par kèr kissoi listoir, kissoi la zéografi, kissoi d’ote matyèr.Si zot i rapèl bien, in zour mwin la di azot pou pass in légzamin téi fo mi aprann in matyèr téi apèl lo droi internassyonal privé. An kouyon matyèr-la ! é pou aprann ali mwin té i fé lo tradikssion dann mon tète.Sa téi aranz amwin bien pou lo droi pars lo droi pou mwin sa sé in matyèr konkrète é lo bann rézoneman ossi, lo bann métode galman pou mwin sa lété konkré.

Konm souvan dé foi nou téi travaye an groupe in pé téi gaskone amwin é kan mwin téi doman azot si zot lé vréman biling é si zot té i pé aprann an fransé dirèk san pass par lo kréol zot téi di amwin oui é dann fon zot zyé mwin téi i oi zot téi pran amwin pou in drol do zigoto é mwin, dann mon kèr mwin té i trouv zotl’avé bonpé la shanss aprann lé shoz épi konprann azot dirèktoman dannn franssé… Amwin k’zot i konfonn légzaktitide pou lé zapépré osinonsa zot i pran otour pou lé zalantour.

Zordi mi konsidèr lo franssé sé pou mwin in lang anprété é mi manyé ali konm in lang anprété, alé oir lo kréol sé in lang noute pèp la fé –la promyèr manifestassion noute jéni anou… é forséman inn é l’ote i tienbo pa lo mèm plass dann noute vi épi dann noute kiltir ké ni vé, ké ni vé pa.

A bon antandèr salu !