Astèr toute sak i yèm malparl bann rsa dann radio épi danntélé. Toute sak i souète k’i koupe sa, si mwin lété zot plass mwin nora kalkil — mèm tourne sète foi mon lang dann mon boush — avan kritik bann RSA.

Dan La franss sé pa lékstrème droite ké lé o pouvoir mé a kou sir in bann i frikote avèk bann kapitalist mé lé pi fassil tir larzan dann la posh bann pov ké dsi bann kpitalist. Sé konmsa k’i sorte fé in nouvo réform lassiranss shomaz késtyonn rogoumante bann pèryode travayé épi d’diminyé bann pèryode indamnizé é sa sé inn an parmi bann promyé mézir lo nouvo promyé miniss la pran.

Mwin téi panss toute demoune téi sar done gouvèrnman tor, mé d’apré sak mwin la antann lé pa konmsa — néna sak la done ali rézon-suivan lo mèm prinssip k’i vo myé tir dsi bann pov ké dsi bann kapitalis sirtou kan wi frékante kalité konmsa la plipar d’tan.

Biensir sak mwin lé sir sé ké in majorité zéléktèr va vote kont zot proshin zélékssion… Pétète pou vote pou léstrème droite ankor pliss akokiné avèk bann kapitalist avèk konm prinssip tir dsi bann pov pou gonf lo pla bann rish. Zot i panss pa, afors fé sa, in zour péi-la va vni difissil pou gouvèrné.

A bon antandèr salu !

Justin