Zordi mi rapèl in zistoir la kours shoval, kan l’avé la kours la Redoute-Sin-Dni épi l’avé in shoval blan téi apèl Verdun é sa l’avé lo fon mèm. Téi apèl ali shoval troi tour é si li lété dèrnyé promyé tour, dann milyé la bann dézyèm tour, troizyèm tour sir li té i gingn. Donk in zour mon gran-pèr la paryé avèk in morissien pou larzan li l’avé poin é donk li la paryé pou Verdun é lo morissien la paryé pou toute lé zot shoval. Sak i dové arivé, l’arivé é Verdun la gagné. Mon gran-pèr la di, aboul la moné sa la fé d’bien son posh.

Nou té sète marmaye dan la kaz épi l’avé ossi toute in famiye kouzin sé dir l’avé lokazyon rakonte zistoir Verdun… donk kan dann tan Paul Vergès la di i sava fé in lipodrome Sin-Pol mwin — konm d’ote pèrsone — nou la mète a révé lo tan in shoval blan téi apèl Verdun téi rovien. Mézami bann politik i doi pa kass lo rèv bann rényoné la myène dann ta, sirtou ké mwin téi koné l’afèr téi avanss avèk la formassion bann jenn rényoné avèk linvètissman dan bann zékiri — l’afèr lété dann sak !

Mé in zour l’ariv in mèr Sin-Paul é li la di : i fé pi lipodrome pars i fo pa ankouraz bann zé d’larzan. Noute rév té brizé : la myène, sète bann moune la mète larzan dedan, épi sak la parti an formassion é dann ta l’avé in jenn ga noute péi i apèl Victoire é so Victoire-la lété doué vèye pa koman mé konm li la pa gingn kour La Rényon li la parti Abou-Dabi é zordi li gingn kours dsi kours shoval dann péi-la… rouv zot téléphone é zot va oir son bann zésploi.

Tristèss ? Nostalji ? La pa domin la vèye nou va rovoir Verdun dann in lipodrome rényoné. Bann paryèr i kontintyé paryé pars zot larzan i pass Maurice, i pass an France, i pass partou… I pass ossi shé nou mé konm i di dsou lo boute noute né é in pé i sèye trape ali san réissite : gouvernman lo bra lé long é lo bozoin pli long ankor.

A bon antandèr, salu !

Justin