Mézami mi sava poz azot in kol. Ala mon késtyon : di amwin si koz kréol sé koz boush sal, pars néna in pé i kroi sa é poitan néna sak i koz poliman an kréol, néna sak i koz boush sal an kréol mé sirtou alé pa kroir ké koz kréol sé débite in kantité zirman.

M’a dir azot kékshoz : si mwin la antandi mon papa ziré, mwin la zamé antann mon momon dir in grossyèzté. An prinssip dann kréol rényoné fitintan bann fiye téi koz san ziré é bann garsson téi priv pa zot in libèrté konmsa.

Solman konm i di, pa dovan oute momon, pa dovan oute gran-mèr, pa dovan lo prète, é pa dovan lo mète d’ékol si ou téi vé pa ramass in lanvèr pou romète aou bon koté… Sa lété dann tan é mi panss sé konmsa k’i fo kontinyé fèr.
Alé ! Mi kite azot rofléshi la dsi é nirotrouv pli dvan, sipétadyé.

Justin