Lindamnizassion ! Pa sète bann viktime mé sète bann bouro ! Pa sète bann zésklav mé sète bann zésklavaziss

11 mé, sanm Justin

Mézami, yèr lété lo dis Mé in date anivèrsèr la loi Taubira, in loi i rokoné lésklavaz avèk la trète konm krime konte l’imanité. Domaz issi la Rényon pou bann marmaye lékol sa lété in zour d’pti vakanss é mwin lé sirésèrtin l’anivèrsèr loi-la lété pa sélébré konm k’i fo é té pa lokazyon in bon losson listoir pou noute zénèss par rapor sak noute zansète la konète.

Déza ké souvan dé foi, demoune néna labitide banaliz bann date konmsa - fèr an sorte demoune i di, lo passé sé lo passé é ni sava pa pass san t’an pou anparl zafèr konmsa… mi rapèl kan mwin lété marmaye, kissoi lékol, kissoi dann la famiye, l’avé in kozman téi sirkil toultan, in kozman téi di laba dann l’Amérik, laba dann bann Zantiye lésklavaz lété dir, bien dir, alé oir issi la Rényon lété mwin dir, kaziman kékshoz dou.

Touziss si i transform pa la sityassion lésklavaz konm in rolassion lamour rante bann mètre épi bann zésklav. Lé si tèlman fassil pardone bann krime la spass dann noute péi avèk biensir la bann viktime mé galman bann kriminèl… Mézami, dann noute bann zansète, sète toute rényoné l’avé bann zésklav bann noir déporté mé l’avé galman bann mètre é mwin lé sir la pa toulmoune lé paré pou aksèpt in vérité si déranzan ké sa. Poitan la vérité sé sa, ké ni vé ké ni vé pa é la véroité i doizète rokoni épi akdsèpté.

Astèr si ni vé rovnir in pé dsi la doussèr lésklavaz issi kan la Rényon téi apèl Bourbon, néna in n’afèr i fo pa ni obliye : kissoi dann bann Zantiye, kissoi issi dann loséan indien partou oussa l’avé la trète épi lésklavaz té i aplike lo kode noir - in kode de loi éspéssyal pou bann zésklav dann zot rolassion avèk bann mètre.I fo pa ni obliye bann shatiman korporèl sa lété marké dann lo famé kode noir, sète 1685 konùm sète 1723...

Mi vé pa solman anparl bann kou d’shabouke, mé galman bann min épi bann pyé koupé, bann jaré transhé épi i fo dir ossi la mort dann déssèrtin ka. Non, lésklavaz té pa dou, lésklavaz té krkiyèl épi inimin dann toute péi l’avé sistème inimin-la é la pa pou rien la loi Taubira la désside lésklavaz épi la trète konm krime konte limanité.

Astèr mi vé rapèl in n’afèr, sé kan lésklavaz té aboli, in pé partou dsi la tèr dann bann koloni bann gouvèrnman la désside vèrs in lindamnité pou dédomaz bann viktime é figuir azot kissa la toush lo dédomazman. ? La pa lésklav lété mal trété, la souf lo martir, la pa bann lété vyolé, mé sak lété lézé dann zot zintéré ékonomik donk bann zésklavaziss lété dé domazé. Téi falé sistème — la té i tèrmine son vi par kékshoz pir ké toute, lindamnizassion bann bouro é pa sète bann viktime.

A bon antandèr salu !

Justin

Padport20 décembre

Signaler un contenu

Inn modékri, inn ti lavi, inn komantèr ?