Défoi sé in vyèye pèrssone k’i abite dann in limèb é lassanssèr lé an pane dopi plizyèr moi. Défoi sé lo sho ké bann famiye na poin alé oir sa lé prévu dann zot kontra. Défoi sé lo toilète k’i fonkssyone pa é lo lapartman lé anvayi avèk bann salté i sorte dann kabiné.

La plipar d’tan lo bayèr sé in bayèr sossyal é d’apré sak mi antann dann bonpé ka i tienbo pa konte la réklamassion bann zizazé… Solman d’apré sak lemoune i di lo bayèr lé rapide kan le moune néna rotar dann lo pèyman loiyé. Sa sé in n’afèr lo bayèr sossyal i tolère pa.

Toute fasson, kissoi bayèr sosssyal osinonsa bayèr privé lo bann moune lokatèr néna droi okipe zot lojman dann la sékirité épi avèk in konfor k’i korèspon lo pri zot loiyé i koute azot… amoinss ké bann sossyété i konsidèr bann lokatèr i toush lalokassion lojman éké zot lémalvéni pou kontèste la manyèr zot lé trété.

Biensir i spé néna plizyèr ka lé pa parèye inn avèk l’ote : défoi sé lo batiman k’lé pa konstrui suivan lé norm é a pène bann lokatèr i rante dann lapartman oila zot annuiman k’i komanss. I pé an avoir dé ka sé lo bayèr li mèm k’i pran pa soin son batiman lé livré dan lé norm — é i lèss dégradé an panssan po d’fèr kont epo d’tèr sé po d’fèr k’i gingn a tou lé kou. Défoi sé le lokatèr lé résponsab si néna in dégradassion.

Donk si mi di i pé an avoir plizyèr résponsabilité wala k’inn i mète la fote dsi l’ote, l’ote i mète la fote dsi in n’ote é pandan s’tan-la kabri i manz salade. Sé lo lokatèr k’i sibi l’annuiman an dèrnyé é li la bo réklamé zamé lo bayèr i done ali satisfakssion.

A bon antandèr salu !

Justin