Nou lé kontan kan i parl lo thé blan, la vaniye blé,lo kafé bourbon pwinti, la byèr spéssyal fé avèk bann rassine nou néna shé nou. Ni suiv avèk kontantman bann zéssploi kissoi dann léspor, kissoi dann la vi kiltirèl, kissoi dann toute domenn laktivité imène. Nou lé étoné par sak bann rényoné di monde lé kapab fèr dann bann péi étranz.

Toudinkou ni mète a kroir noute péi i sava gingn fé son dékolaz ékonomik, in pé tar mé tanpi o mwinss ni avanss astèr. Mé oila vitman-vitman la réalitéi ratrape anou ; toute signal d’alarme noute zoinal épi noute parti i signal dopi lontan lé ankor la zordi mèm bann nouvo signal i aparète dann noute syèl rényoné é la mizèr k’i kontinyé akable plizanpliss demoune dan noute péi.

In zoinal i fèrm .In konpagni lavyassion lé an danzé.Bann kapitaliss déor i trène la Réjyon dovan lo tribinal administratif, in l’assossyassion sar pétète talèr an likidassion zidissyèr ,néna touzour pliss san mil zilétré, noute prodikssion kann lé pa sové, in gran transh popilassion lé dann shomaz é lo spèkte lo gran ranplassman i toke dsi noute baro.

Sinp pti nyaz osinonsa siklone anonssé ? Rolé passé korèktoman osinonsa rolé mal passé ? Nou sré pa ankor in kou dann la zone tanpète ? A sirvéyé konm lé dsi l’fé.

A bon antandèr salu !