Pou kossa mi di sa, pars yèr sansa avan-yèr li té apré gaskone lo nouveau front populaire pars i shanj nom souvan épi lèr d’zordi li koné pa koman sa i apèl. Venan d’li, sa i étone pa mwin pars néna inn somenn édmi li téi déklar dann Rényon Promyèr lésklavaz issi La Rényon sa néna lontan mèm pétète mil an.

In sakré rokor pou in péi — a mwins avèk li i fo pa dir péi — néna talèr 350 zané d’pèpléman — mé mi panss pa si li koné kossa lété lo front popilèr é kansa sa la éspassé. Alon pa domann ali kossa lo front popilèr la amenn konm konkète sossyal pars lé possib li va rotrouv ali konm in poule dovan in kanète a kalkilé si sa sé d’mayi sansa si sa lé pa.

Mézami lé bien domaz lédikassion popilèr zordi ankor sa lé néglijé é biensir listoir lé pa tro bien amontré mèm mal anségné, si tèlman lo pèp lé dézarmé dann in sityassion konmsa, sirtou kan listoir épi la filozofi lé pa tro bien amontré dann lékol La Répiblik… Mé antanssion si wi vé konète, zordi i fo wi sava aprann é néna bann sours pou aprann zordi…

Mé konm in pé i di souvan défoi, na pwin tik-tak pou fé boir in bourik la pa soif é lé domaz. Lé domaz pars talèr in pé bann nouvo fron nassyonal lé riskab alé shèrch dann bann liv lo vyé Jean-Marie bann bone fraz épi bann bon zé d’mo konm « Durafourkrématoir » épi d’ote ankor. A défo d’fèr konète anou lo monde néna do koi fé dézaprann lo monde par zot militan.

A bon antandèr, salu !

Justin