Astèr alon anparl in pé zélékssion é anparl in pé bann déba - i pé di galman bann sobatkoz si zot i aksèpe so mo-la. Kossa mi vé antann kan demoune l’apré débaté donk sobatkozé ? Mi vé antann sak zot i vé fé dizon pou lo péi… suivan lo diagnostik zot nora fé. Sanm pou mwin lo poin fèb bann déba roganizé dann radio - sansa dann télé lé dann lo fète lo bann zékspèr d’in kanpagn i fé pa in vré diagnostik.

Si mi di mon péi lé malade é si mi anonss sak lé pa bon dann son bilansanté - dizon lo bann voiyan lé o rouz toultan é toultan — a kondission mwin la bien étidyé sa dsi la diré… Si mon létide lé kass-an-paye lé pa bon konm zot i konpran. Mé inn foi k’la fine fé lo bilan-santé, i fo fé lo diagnostik pars konm shé lo doktèr — si la pa in doktèr lo sikré — i fo fé lo diagnostik é la plipar d’tan i fé pa sa dann la politik… I larg la soss dann bann solission é k’i solissione pa la plipar di tan sof par plass é ankor.

Noute kamarade Paul Vergès téi anparl souvan lo privilèz dé laz é privilèz-la i amontre amwin final man ziska zordi é dopi 1946 noute péi la pankor gingn in vré trètman d’fon. Sak la fé, la plipar d’tan sé pou konbate parti kominiss é dizon lo bann pouvoir gosh konm droite la réissi zot kou. Mé konbate lo parti kominiss sa i vé pa dir ké lo bann pouvoir l’avé la solission pou trète la maladi noute péi. La prèv, ni lé konm ni lé, atipik konm in pé i di.

Si noute péi lé atipik, sa i vé pa dir li lépa an bone santé sansa par plass - malade par plass, an bone santé par plass - voyan rouz é voiyan vèr mélanzé… A la kours déyèr in paké kado-solission mé san rézilta global atandi. Pou sa i fodré in plan rényoné fé par bann rényoné pou bann rényoné lo zour va désside ékoute in pé noute parti kominiss rényoné… Mi éspèr avan k’lo malade i mor an bone santé.

A bon antandèr, salu !

Justin