Pars final de konte, néna agrikiltèr épi agrikiltèr. Néna sak lé plin o zass, épi sak lé si tèlman andété ké zot i mète la korde inn tou lé troi zour. Néna sak i konsidèr l’agrikiltir konm in l’indistri épi sak néna konm in tradission familial é lo dê kalité la pa parèye ditou… Néna in n’ote afèr si mwin lété bann plantèr mwin nora méfyé : i paré dann gouvèrnman néna la moityé lémilti-milyonèr an lëro ; mèm in pé lé milyardèr donk lintéré zénéral mi pans spa sa sé in n’afèr i fatig tro zot tète... Romarke sa sé La franss mé an parmi bann l’Érop néna galman in bann lé milti milyonèr mèm défo milyardèr.

Zot i koné larzan i atir larzan é sak la poin lé konm ki diré in pé bordé é i rèst azot lo shoi rante lo dézéspoir épi la révolt : in tan pou inn épi in tan pou l’ote. A biensir gouvernman i fé banna gran promèss mé malorozman in promèss i angaz pa sak i fé mé sak i kroi konm in gran politik fransé - Edgard Faure téi di… Astèr ni romarke konm toultan losalon l’agrikiltir sé in gran spéktak é bonpé d’moune sar kontan, pars lo spéktak demoun i yèm sa mé in zour kan va fé kli klip de fin, kossa va résté :

In bon solission pou bann zagrikiltèr ? Sansa fass a fass dê kalité d’moune, sète larzan épi sète la difikilté, Mi oi pa l’érop tèl ké li lé zordi apore in pon solission bann problèm éropéin. Ki vivra véra mésa i anpèsh pa nou rogarde la télé, épi bate la min kan v’amontr kékshoz lé éstra. An atandan, kabri imanz salade ? Mi panss pa sa san pour san, sansa kossai ansèrv la lite alor ?

A bon antandèr salu !

Justin