Lo Tanika pou lékilib énèrzétik La Rényon
26 zwiyé, sanm
Mézami, kossa i lé in tanika ? Sirman in mo bann zansien i rapèl — pétète i ansèrv ankor — an fète sé in mo néna dann in bonpé vokabilèr in pé toute péi. Axel Gauvin, prézidan lofis la lang, la anvoye pou mwin in lésplikassion néna dann liv lo poète Albany é wala kossa i di :
In réssipyan pou porte de lo. In mo d’in péi i apèl la Somalie. Sa i ranplass kalbass sansa in pé toute sak i ansèrv pou porte lo dsi la tète. I pé z’ète in bidon léssanss sansa d’ote kalité réssipian.
Astèr pou kossa mi rakonte azot sa ?
Pars sa in nom bann l’Edf i sava done in linstalassion par koté Sind-Ni é pou fèr kossa ? Zot i koné dann in zourné néna déssèrtènn z’èr i ansèrv in bonpé kouran é déssèrtènn z’èr i ansèrv mwinss. Alor banna la gingn lidé fé in sorte santral éléktrik avèk lo d’mer.
Kan néna tro d’kouran i ral dolo an otèr avèk lo kouran an tro épi kan lé an manke kouran lo i déssann dsi la mèr pou fé tourn bann tirbine épi alimante lo rézo an kouran éléktrik.
In nouvoté ? Pa tèlman pars sé par in sistèm a popré konmsa ké lil El Hierro dann bann zil Kanari la gingn trape son lotonomi dann lénèrzi. Laba kouran i vien par lo van. Mé lo sistèm lé konm sète lo Tanika sof ké la fé bien avan La Rényon i prévoi pou fèr.
Noré pou dir la dsi é poukoué la atann si tèlman d’tan mé konm i di : lé tar mé lé pa tro tar ?
Abon antandèr salu !
Justin
Signaler un contenu
Inn modékri, inn ti lavi, inn komantèr ?
