Méssyé Issa Sanogo téi roprézante l’ONU dann Antananarivo la kapitale Madagascar. Astèr li lé sirman pi laba, mé kan li lété li téi suiv la manyèr lo bann moune té i invante zafèr pou lite konte lo klima boulvèrsé é oila sak li rakonte dann ONU info :

Na pwin tro lontan — sé li k’i rakonte — mwin la konète in agrikiltèz téi rèste Betroka in pti vil dann sid lo péi. Madam-la l’avé problèm avèk lo randman son bann plantaz. El téi plante maniok dann son bitassion, par-la san pyé é èl l’avé difikilté pou done manzé son famiye. Lo randman té fèb é sirtou dann son landroi la plui téi tonb pa pli k’i anfo.

In l’idé la pass dann son tète : é si èl téi plante son manyok dann konpost olèrk dann la tèr sèk. El la fé.épi èl la mète in boutir manyok par panyé konpost é lo randman son plantaz la bien goumanté - mi panss ni dovré fé l’éssé issi la Rényon… Biensir ni plante pa mèm kalité manyok ké laba. Biensir dann bonpé landroi nou la fine abime noute tèr. Si Madagaskar i nyabou fé sa nou ossi ni pé avoir in bon sirpriz si ni fé parèye.. Antouléka léspèryanss lé a fèr.

Donk wala kossa méssyé Sanogo i rakonte : lo madam la plante in santène boutir manyok dann bann panyé konpost. Avan èl téi gingn troi-kat kilo par pyé é wala k’èl i gingn in vintène kilo par pyé… Si mi rapèl bien mon papa lété plantèr é d’apré sak li téi di amwin li téi gingn par-la san tone manyok par éktar mé li téi ansèrv langré dann in tèr lété pankor fatigué par in sirésploitassion. Mwin la touzour trouv sa formidab ébin sète lo madam Malgash lé ankor pli formidab, san langré, arienk avèk konpost son karo i done vin kilo par pyé...

Dann lékonomi son ménaz sa l’amenn in vré révolission : son famiye la bien manzé épi sak èl téi vann téi ansèrv aèl pou in méyèr vi... Mèm avèk l’ède internassyonal el la produi son kouran avèk bann plake fotovoltïk el la rante pazapa dann la modèrnité é konm mi di èl la révolissyone sa vi épi sète son ménaz.

Mézami la pa touzour bnoute voizine lé égzanplèr m é^pou inn foi, lé bon anparlé.

A bon antandèr salu.

Justin