Biensir sa i vo pou la danss klassik pars sa lé kodifyé dopi lontan, sa lé amontré, épi bann amontrèr ofisyèlman sé bann moune diplomé. Arzoute avèk sa bann zélèv sansa zot paran i shoizi lo kour in tèl, in tèl pou aprann la danss klassik dann lé règ dé l’ar. Donk mi diré sa i vo pou bann zinstitission mé pou bann danss réjyonal.

Mi panss sa i doi pa marsh parèye pars bann danss réjyonal sa lé amontré par bann militan kiltirèl la aprann sa avèk d’ote militan kiltirèl, sansa avèk zot vyé famiye épinéna l’amour zot nassio, l’amour zot kiltir, lamour zot danss… pars si té i falé konte dossi l’Eta pou k’demoune i koné danss bann danss réjyonal, mèm aprann sa, i fé lontan banna nora té mor — nora té disparète.

Astèr si ni rogarde inpé noute bann danss konm séga, konm maloya, kabaré ni koné koman bann danss-la lé éné, koman zot la konsèrvé é koman i aprann sa zordi. Nou lé sirésèrtin si i fo in diplom pou amontr sa, ébin mi oi nou mal, mi oi nou sirman an danzé oir noute kiltir disparète. Konm ki diré in moiyin tyé azot pars zot la rofiz mor malgré la ropréssion.

D’in sanss wi pé dir si i vé proféssyonaliz bann amontrèr maloya, séga, hip-hop, zoumba, danss bretone ou d’ote lé méyèr pars lo zapépré i fonkssyone arpa mé i fo pa konète gouvèrnman sa in kouto pou koupe dë koté é si li avanss blan lo noir i tarde pa ratrape ali par déyèr — koulèr la pola pa la koulèr lo kèr.

Sirtou ké la loi d’apré sak mwin la antann i prévoi bann prossé vèrbal pou sak i amontr in danss réjyonal san diplôme prévi éksopré pou sa. Dizon gouvèrnman i rode fé lèv la guèr li la. Sé pou sa mi di alon fèr atanssion, alon ète méfyan épi vizilan pars sirésèrtin bann birokrate i mérite pa noute konfyanss.

A bon antandèr, salu !

Justin